ஆடி மாதம் என்றாலே மக்கள் அனைவருக்கும் மனதில் தோன்றுவது தள்ளுபடி விற்பனையே. பொதுவாக ஆடிமாதங்களில் திருமணம் போன்ற எந்த ஒரு மங்கல நிகழ்ச்சிகளும் நடைபெறாது. இதன் காரணமாக ஜவுளி, தங்க நகைகள், பாத்திரம் உள்ளிட்ட வீட்டு உபயோக பொருட்களின் விற்பனை மந்தமாகி தேக்கநிலை ஏற்படும். தேங்கிய பொருட்களை விற்பனை செய்யவும், தீபாவளி மற்றும் பொங்கல் உள்ளிட்ட பண்டிகைகளுக்கு விற்பனை செய்ய தேவையான புதிய ரகங்களின் முதலுக்கான நிதியை திரட்டுவதற்காகவும் வியாபார நிறுவனங்கள் தொடங்கியதே இந்த தள்ளுபடி விற்பனை.
பொதுமக்களும் இந்த தள்ளுபடி விற்பனையை பயன்படுத்தி தீபாவளி, ரம்ஜான், கிறிஸ்துமஸ், பொங்கல் போன்ற பண்டிகைகளுக்கு தேவையான பொருட்களை குறைந்த விலையில் வாங்கி வருகின்றனர். சிறிய வியாபார நிறுவனங்கள் முதல் பெரிய வியாபார நிறுவனங்கள் வரை இந்த தள்ளுபடி வியாபார யுக்தியை கடைபிடித்து வருகின்றனர்.
இந்த வருடம் ஆடி தள்ளுபடி விற்பனை கடந்த 15-ந் தேதி முதலே தொடங்கி நடந்து வருகிறது. முன்னணி ஜவுளி விற்பனை செய்யும் நிறுவனங்கள் 6 முதல் 60 சதவீதம் வரையும், செல்போன், டி.வி. மிக்சி, கிரைண்டர் விற்பனை செய்யும் நிறுவனங்கள் தள்ளுபடியுடன், கேஷ்பேக் சலுகையும் வழங்குகிறது.
NEWS EDITOR : RP
