மணிப்பூரில் வன்முறை தீவிரமாக இருந்த போது, 2 பெண்களை வன்முறைக் கும்பல் ஒன்று நிர்வாணப்படுத்தி அழைத்துச் சென்று பாலியல் வன்கொடுமை செய்த வீடியோ வெளியாகி நாடு முழுவதும் பெரும் கொந்தளிப்பை ஏற்படுத்தியது.
இதனையடுத்து, உச்ச நீதிமன்றம் இந்த வீடியோ விவகாரத்தை தன்னிச்சையாக விசாரணைக்கு ஏற்றுக் கொண்டது. இது தொடர்பான விசாரணை கடந்த 1-ந் தேதி உச்சநீதிமன்ற தலைமை நீதிபதி அமர்வில் நடைபெற்றது. அப்போது, மணிப்பூர் வீடியோ விவகாரத்தில், மத்திய, மாநில அரசுகள் மீது உச்சநீதிமன்ற தலைமை நீதிபதி கடும் அதிருப்தி தெரிவித்தார். மணிப்பூரில் இரண்டு மாதங்களாக வன்முறை நடக்கிறது, ஒரு FIR கூட பதிய முடியவில்லையா? என்று கேள்வி எழுப்பிய தலைமை நீதிபதி, மணிப்பூரில் சட்டம் ஒழுங்கு சீர்கெட்டுள்ளதாகவும், அரசியலமைப்பு முடங்கியுள்ளதாகவும் குறிப்பிட்டார்.
6000-க்கும் அதிகமான FIR பதிவு செய்யப்பட்ட நிலையில், 50 மட்டும் சிபிஐ-க்கு மாற்றப்பட்டுள்ளது என்றால் மற்றவை நிலை என்ன? என்று கேள்வி எழுப்பிய தலைமை நீதிபதி, பொறுப்புகளை செய்ய மணிப்பூர் போலீசாருக்கு தகுதி இல்லையா? அல்லது ஆர்வமில்லையா? என்று கேட்டார்.
அப்போது வாதிட்ட மத்திய அரசு தரப்பு வழக்கறிஞர், மணிப்பூர் வன்முறை என்பது பல பிரச்னைகளையும், விவகாரங்களையும் உள்ளடக்கியது என்றும், மணிப்பூர் விவகாரத்தில் நீதிமன்றம் முடிவு செய்வது என்பது மிகவும் கடினம் என்றும் குறிப்பிட்டார். மணிப்பூர் விவகாரத்தை எவ்வாறு அணுகுவது என்பது அரசுக்குதான் தெரியும் என்று மத்திய அரசு தரப்பில் தெரிவிக்கப்பட்டது.
அப்போது, FIR-ல் பெயர் எங்கே, என்ன நடவடிக்கை எடுக்கப்பட்டுள்ளது என்று மத்திய அரசுக்கு கேள்வி எழுப்பிய நீதிபதிகள், சம்பந்தப்பட்ட நபர்கள் மீதான நடவடிக்கை என்ன என்பதை நீதிமன்றம் கேட்க முடியும் என்று குறிப்பிட்டனர். இதையடுத்து, வழக்கை திங்கட்கிழமைக்கு ஒத்திவைத்த தலைமை நீதிபதி அமர்வு, மணிப்பூர் டிஜிபி நேரில் ஆஜராகி விளக்கமளிக்கவும் உத்தரவிட்டது.
இந்த நிலையில், இந்த வழக்கு உச்ச நீதிமன்றத்தி தலைமை நீதிபதி டி.ஒய்.சந்திரசூட், நீதிபதி ஜே.பி.பர்திவாலா, நீதிபதி மனோஜ் மிஸ்ரா ஆகியோர் கொண்ட அமர்வு முன்பு இன்று மீண்டும் விசாரணைக்கு வந்தது. அப்போது மணிப்பூர் டிஜிபி நேரில் ஆஜராகி விளக்கமளித்தார். அப்போது மணிப்பூரில் மே மாதம் முதல் ஜூலை வரை 6,523 எஃப்ஐஆர்கள் பதிவு செய்யப்பட்டுள்ளன . இந்த வழக்குகளை விசாரிக்க 42 எஸ்ஐடிகளை அமைக்க உள்ளதாக தெரிவிக்கப்பட்டது.
பின்னர் மத்திய அரசு தரப்பில் ஆஜரான வழக்கறிஞர் ஆர்.வெங்கடரமணி மணிப்பூரில் அரசு எதுவும் செய்யவில்லை என்ற செயற்கையான கருத்து உருவாக்கப்பட்டுள்ளது. இது மிகவும் குழப்பமான சூழ்நிலை. வெளியில் விசாரணை நடத்தினால் மக்கள் மத்தியில் அவநம்பிக்கை ஏற்படும். பாலியல் வன்கொடுமை தொடர்பான 11 எஃப்ஐஆர்களை சிபிஐ வசம் ஒப்படைக்க முடிவு செய்துள்ளோம். மணிப்பூர் விவகாரத்தில் நிலைமையை இதுவரை முதிர்ந்த அனுபவத்தோடு தான் கையாண்டுள்ளோம் என்று தனது வாதத்தை முன் வைத்தார்.
மேலும் தொடர்ந்து பேசிய அட்டர்னி ஜெனரல் ஆர்.வெங்கடரமணி கூறுகையில், வெளி விசாரணைக்கு இடமளிக்காமல் மாவட்ட அளவில் எஸ்ஐடி அமைக்கப்படும். வன்முறையால் பாதிக்கப்பட்ட 6 மாவட்டங்களில் மூத்த போலீஸ் அதிகாரிகளை உள்ளடக்கி எஸ்ஐடி அமைக்கப்பட்டுள்ளது. எஸ்ஐடிக்கு போலீஸ் சூப்பிரண்டு நிலை அதிகாரிகள் தலைமை தாங்குவார்கள். எஸ்ஐடியின் செயல்பாட்டை டிஐஜி மற்றும் டிஜிபி அளவிலான அதிகாரிகள் கண்காணிப்பார்கள் என்று தெரிவித்தார்.
பெண்கள் குற்றங்களை சிபிஐ விசாரிக்கும்;
பெண்களுக்கு இழைக்கப்பட்ட அநீதி தொடர்பான 12 வழக்குகளை சிபிஐ விசாரிக்கும் என்று சொலிசிட்டர் ஜெனரல் துஷார் மேத்தா நீதிமன்றத்தில் தெரிவித்தார். பெண்களுக்கு எதிரான குற்றங்கள் தொடர்பான மற்ற வழக்குகள் வெளிச்சத்துக்கு வந்தால், அவற்றையும் சிபிஐ விசாரிக்கும். அவர்கள் அனைவரும் பெண்களாக இருப்பார்கள். சிபிஐ குழுவில் இரண்டு பெண் எஸ்பி அதிகாரிகள் இருப்பதாக அவர் கூறினார்.
இதற்கு பதிலளித்த உச்ச நீதிமன்றத்தின் தலைமை நீதிபதி சந்திரசூட், ‘சிபிஐக்கு மாற்றாக’ இருக்க விரும்பவில்லை. மற்ற மாநிலங்களில் இருந்து குறைந்தபட்சம் துணை போலீஸ் சூப்பிரண்டு (DSP) அந்தஸ்தில் உள்ள 5 அதிகாரிகளையும் சேர்த்துக் கொள்ள வேண்டும். தலா ஆறு எஸ்ஐடிகளின் பணியை கண்காணிக்க ஆறு டிஐஜி தரவரிசை அதிகாரிகளை பெயரிடுமாறு ஆறு மாநிலங்களின் டிஜிபிகளுக்கு உத்தரவிடப்படும் என்று கூறினார்.
காவல்துறையை நம்புவது நல்லதல்ல;
மூத்த வழக்கறிஞர் இந்திரா ஜெய்சிங் வாதிடுகையில், மணிப்பூரில் போராட்டம் தொடர்கிறது. எனது வழக்கு விசாரணை மற்றும் மேலும் குற்றங்களைத் தடுப்பது பற்றியது. அதே சமயம், பெண்களுக்கு எதிரான குற்றங்கள் தொடர்பாக 16 எஃப்ஐஆர்கள் உள்ளதால், அவை அனைத்தும் சிபிஐக்கு மாற்றப்பட வேண்டும் என்று வழக்கறிஞர் நிஜாம் பாஷா கூறினார். எஸ்ஐடி மீது கேள்விகளை எழுப்பிய அவர், அது மாநிலத்தால் தேர்ந்தெடுக்கப்பட்டது என்று கூறினார்.
குற்றச் செயல்களுக்கு காவல்துறை உடந்தையாக இருப்பதாக குற்றம் சாட்டப்படுகிறது. நீதிமன்றத்தின் மூலம் தேர்வு செய்யப்பட வேண்டும். ஆயுதங்கள் மற்றும் வெடிமருந்துகள் விநியோகம் குறித்து விசாரிக்க சுதந்திரமான அமைப்பு இருக்க வேண்டும் என்று வழக்கறிஞர் பிரசாந்த் பூஷன் வாதிட்டார். விசாரணையில் காவல்துறை அதிகாரிகளை நம்பாமல் இருப்பது சரியாக இருக்காது என்று எஸ்.ஜி.மேத்தா கூறினார்.
இதனையடுத்து, அனைவரது வாதங்களையும் கேட்ட தலைமை நீதிபதி சந்திரசூட் அமர்வு , உயர்நீதிமன்றங்களில் ஓய்வு பெற்ற 3 பெண் நீதிபதிகள் கொண்ட குழுவை அமைத்து உத்தரவிட்டது. இதில் நீதிபதி கீதா மிட்டல், நீதிபதி ஷாலினி ஜோஷி மற்றும் நீதிபதி ஆஷா மேனன் ஆகியோர் அடங்குவர். நீதிபதி கீதா மிட்டல் குழுவின் தலைவராக இருப்பார். இந்த குழு விசாரணை, நிவாரணம், இழப்பீடு, மறுவாழ்வு போன்றவற்றை விசாரிக்கும். இதுபோன்ற முயற்சிகள் மேற்கொண்டு, மக்களுக்கு நம்பிக்கையை ஏற்படுத்த வேண்டும். அதே நேரத்தில், சிபிஐ விசாரணையை ஐபிஎஸ் அதிகாரி ஒருவர் மேற்பார்வையிடுவார் என்று உச்ச நீதிமன்றம் தெரிவித்துள்ளது.
நீதிபதி மிட்டல் ஜம்மு காஷ்மீர் உயர் நீதிமன்றத்தின் ஓய்வு பெற்ற தலைமை நீதிபதி ஆவார். நீதிபதி ஜோஷி பம்பாய் உயர் நீதிமன்ற ஓய்வு பெற்ற நீதிபதி ஆவார். நீதிபதி மேனன் டெல்லி உயர்நீதிமன்றத்தில் நீதிபதியாக இருந்து ஓய்வு பெற்றவர்.
மேலும், மகாராஷ்டிராவின் முன்னாள் டிஜிபியும், என்ஐஏ அதிகாரியுமான தத்தாத்ரே பட்சல்கிகரை விசாரணை அமைப்புகளின் விசாரணையை கண்காணிக்க உச்ச நீதிமன்றம் நியமித்துள்ளது. விசாரணையை மேற்பார்வையிட ஒரு அதிகாரியை நியமிப்பதன் மூலம் ‘மேலும் ஒரு அடுக்கு பாதுகாப்பு’ சேர்க்கப்படும் என்றும் உச்ச நீதிமன்றம் சுட்டிக்காட்டியது. அவர் நீதிமன்றத்தில் மீண்டும் புகாரளிப்பார். மகாராஷ்டிர முன்னாள் டிஜிபி மற்றும் மும்பை போலீஸ் கமிஷனரான தத்தாத்ரே பட்சல்கிகர் ஐபிஎஸ், மேற்பார்வை அதிகாரியாக நியமிக்கப்பட்டார். நீதித்துறை குழு மற்றும் தத்தாத்ரே பட்சல்கிகர் இருவரும் தனித்தனியான அறிக்கைகளை உச்ச நீதிமன்றத்தில் சமர்ப்பிக்க அறிவுறுத்தப்பட்டுள்ளனர்.
NEWS EDITOR : RP
